«Նոա». անցած մրցաշրջանի ամենաուժեղ թիմը, որը չդարձավ չեմպիոն
Հուլիսի 31-ին մեկնարկում է ՀՊԼ 26/27 մրցաշրջանը։ Մինչ այդ հերթով անդրադառնալու ենք առաջնության բոլոր մասնակիցներին՝ անցած մրցաշրջանի վիճակագրություն, խաղաոճ ու հիմնական կազմ, ամառային տրանսֆերներ, կանխատեսում և ֆենթզի։
Չեմպիոն դարձավ «Արարատ-Արմենիան»։ Նոր մրցաշրջանի մեր գլխավոր ֆավորիտը «Նոան» է։
Լիգայի լավագույն թվերը
«Նոան» առաջնությունն ավարտեց երկրորդ հորիզոնականում՝ չեմպիոնից հետ մնալով չորս միավորով։ Սակայն գրեթե բոլոր հիմնական ցուցանիշներով թիմը լավագույնն էր լիգայում՝ 61 խփած և ընդամենը 19 բաց թողած գոլ, ինչպես նաև +42 գոլերի տարբերություն։
Թիմը չեմպիոնից 11 գոլով ավելի շատ խփեց և 6-ով պակաս բաց թողեց։ Տարավ 9 հաղթանակ՝ առնվազն երեք գոլի առավելությամբ։ Միայն վերջին երեք տուրերում «Նոան» 4:0 հաշվով հաղթեց «Արարատ-Արմենիային», 8:3 հաշվով՝ «Արարատին» և 5:0 հաշվով՝ «Ուրարտուին»։
Այդ դեպքում ինչո՞ւ վիճակագրությամբ ամենաուժեղ թիմը չդարձավ չեմպիոն։
Եվրագավաթները մրցաշրջանը բաժանեցին երկու մասի
«Նոան» երկրորդ տարին անընդմեջ դուրս եկավ Կոնֆերենցիաների լիգայի հիմնական փուլ, իսկ այս անգամ նույնիսկ մեկ քայլ առաջ գնաց՝ փլեյ-օֆֆի առաջին խաղում 1:0 հաշվով հաղթելով «ԱԶ Ալկմաարին», թեև պատասխան խաղում զիջեց:
Հենց այդ եվրագավաթային արշավն էլ ներքին առաջնությունը գրեթե հավասարապես բաժանեց երկու մասի։
Երկրորդ հատվածում «Նոան» ընդհանրապես պարտություն չկրեց՝ տոնելով տասը հաղթանակ, գրանցելով երկու ոչ-ոքի, խփելով 36 և բաց թողնելով ընդամենը հինգ գոլ։ Նման տեմպով ամբողջ մրցաշրջանի ընթացքում թիմը կհավաքեր 72 միավոր։ Հայաստանում ոչ մի թիմ նույնիսկ մոտ չէր նման արդյունքի։
Խնդիրը մրցաշրջանի առաջին կեսն էր։ Հինգշաբթի-կիրակի խիտ գրաֆիկի պայմաններում «Նոան» առաջին 15 տուրերում գրանցեց վեց ոչ-ոքի և կրեց երկու պարտություն։ Այդ ընթացքում «Արարատ-Արմենիան» տասը միավորի առավելություն ստացավ։ Ավելի ուշ «Նոան» հետ բերեց ութ միավորը, սակայն տուրերը սպառվեցին։
Կա նաև մեկ այլ վիճակագրություն։ Մրցաշարային աղյուսակի ստորին հատվածի հնգյակի դեմ կայացած 15 խաղում «Նոան» վաստակեց 40 միավոր, ինչը լավագույն արդյունքն էր լիգայում։ Սակայն առաջատար հնգյակի մյուս թիմերի դեմ անցկացրած 12 խաղում վաստակեց ընդամենը 16 միավոր։ Ի համեմատություն՝ «Արարատ-Արմենիան» նմանատիպ հանդիպումներում հավաքեց 21 միավոր։ Հենց այդ հինգ միավորի տարբերությունն էլ վճռորոշ եղավ չեմպիոնական պայքարում, որտեղ «Նոան» զիջեց ընդամենը չորս միավորով։
Այստեղ ոչ ոքի տեղն ապահովագրված չէ
Պերկովիչը 27 տուրերում խաղադաշտ դուրս բերեց 27 տարբեր մեկնարկային կազմեր։ Ամբողջ մրցաշրջանի ընթացքում ոչ մի անգամ մեկնարկային տասնմեկը չկրկնվեց։
Այս ամենի պատճառներից մեկը եվրագավաթներն են։ Հինգշաբթի-կիրակի խաղացանկը կապում է մարզչի ձեռքերը, իսկ «Նոան» առաջնությանը զուգահեռ անցկացրեց 16 եվրագավաթային հանդիպում։ Բայց խնդիրը միայն հոգնածությունը չէր։ Անգամ ամենաշատ խաղաժամանակ ստացած չորս պաշտպաններն ամբողջ մրցաշրջանում ընդամենը յոթ անգամ միասին դուրս եկան խաղադաշտ։ 35-ամյա Հովհաննես Համբարձումյանը տասը հանդիպում սկսեց աջ եզրից։ Իսկ դարպասապահի դիրքը երեք անգամ փոխեց իր տիրոջը։
Հայաստանի առաջնությունում Պերկովիչը հիմնականում կիրառում էր 4-2-3-1 մարտավարությունը։ Եվրագավաթներում սխեման փոխվում էր՝ կախված մրցակցից։
Ստորև ներկայացված են այն ֆուտբոլիստները, ովքեր ամենաշատն են ընդգրկվել մեկնարկային կազմում։ Սակայն հարկ է նշել, որ հենց այս տասնմեկյակը երբեք միասին խաղադաշտ դուրս չի եկել։
Այս կազմում մեկ անուն արժանի է ավելի մեծ ուշադրության, քան ստացել է մինչ այժմ։ Գոռ Մանվելյանը՝ որպես ենթահարձակվող և ստեղծագործող կիսապաշտպան, 27 խաղերից 16-ում եղել է մեկնարկային կազմում՝ նույնքան, որքան Տակուտո Օշիման, և աչքի է ընկել չորս գոլով ու չորս գոլային փոխանցումով։ Նա 24 տարեկան է, հայ է և այս ամենն անում էր երկրի լավագույն հարձակման գծում։ Նրան նույնպես ռոտացիայի էին ենթարկում․ 16 մեկնարկային խաղ նշանակում է, որ 11 հանդիպում նա սկսել է պահեստայինների նստարանից։ Բայց ակումբում ոչ ոք նրանից ավելի երկար չի պահպանել այդ դիրքը հիմնական կազմում։
Մնացած դիրքերում ևս կազմը նույն կերպ փոխվում էր։ Նաթանաել Սենտինին մեկնարկել է 19, իսկ Էրիկ Բոակյեն՝ 17 անգամ, սակայն Ներմին Զոլոտիչն էլ հասցրել է 12 խաղում լինել մեկնարկային կազմում՝ մինչև պորտուգալական «Ֆարենսե» տեղափոխվելը։ Դարպասի գծում Արթուր Կոնեգլիանը խաղացել է 12, Օգնյեն Չանչարևիչը՝ 8, իսկ Տիմոթի Ֆայուլուն՝ 4 հանդիպումներում։
Նույնիսկ եզրերը, որոնք թվում էին «Նոայի» ամենակայուն դիրքերը, իրականում այդքան էլ անփոփոխ չէին։ Հելդեր Ֆերեյրան և Մարին Յակոլիշը 27 խաղից մեկնարկել են համապատասխանաբար 21 և 20 հանդիպումներում, ինչը նշանակում է, որ մոտ մեկ տասնյակ խաղերում մեկնարկային կազմում ընդգրկվել են այլ ֆուտբոլիստներ։ Վալենտին Կոստակեն թիմին միացավ ձմռանը և անմիջապես սկսեց արդյունք ապահովել՝ գրանցելով մեկ գոլ և երեք փոխանցում ընդամենը 351 րոպեում (ակումբում մնացողների մեջ լավագույն ցուցանիշը), սակայն հետո վնասվածք ստացավ։
Եվ սա հենց «Նոայի» գլխավոր առանձնահատկությունն է, որը հարկ է ընդգծել հենց հիմա. սա Հայաստանի ամենախորը և լայն ռոտացիա ունեցող կազմն է, ինչն էլ այն դարձնում է ամենաբարդը ֆենթզիում ճիշտ ընտրություն կատարելու առումով։
Հարձակման խորություն, բայց երեք ցավոտ կորուստ
«Նոան» կախված չէր մեկ վառ ընդգծված ռմբարկուից։ Նարդին Մուլահուսեյնովիչը, Մաթեուշ Այաշը և Հելդեր Ֆերեյրան առաջնությունում խփեցին տասական գոլ. երեքն էլ գրանցեցին միևնույն ցուցանիշը այն դեպքում, երբ, օրինակ, «Ուրարտուի» լավագույն ռմբարկուն միայնակ ապահովում էր թիմի գոլերի 40%-ը։ Մարին Յակոլիշը ձախ եզրից կատարեց ութ գոլային փոխանցում, Գուստավո Սանգարեն կիսապաշտպանությունից աչքի ընկավ ինը արդյունավետ գործողությամբ, իսկ ընդհանուր առմամբ գոլի հեղինակ դարձան «Նոայի» 17 տարբեր ֆուտբոլիստներ։
Այս աղյուսակում հաստատված երեք հեռացող հարձակվողները միասին խփել են 23 գոլ՝ ապահովելով «Նոայի» բոլոր գոլերի 38%-ը։ Մուլահուսեյնովիչը տեղափոխվել է «Վոյվոդինա»՝ ըստ տվյալների 700 000 եվրոյով։ Մաթեուշ Այաշը հեռացավ ընդամենը 804 րոպեում տասը գոլ խփելուց հետո։ Իսկ Ուլադ Օմարի հեռանալով՝ թիմը կորցնում է ենթահարձակվողների շարքում ամենաարդյունավետ խաղացողին։
Սա իրական կորուստ է։ Եվ հենց դա է պատճառը, որ «Նոան» ոչ թե պարզապես պահեց անցած մրցաշրջանի խորությունը, այլ նորից կառուցեց հարձակման գիծը։
Պերկովիչը վերջապես ունեցավ նախամրցաշրջանային շրջան
Անցած ամառը շատ սեղմ էր։ Հունիսի 14-ին առաջնություն-գավաթ կրկնակի նվաճումից հետո հեռացավ Ռուի Մոտան, և նույն օրը նշանակվեց Սանդրո Պերկովիչը։ Որպես «Նոայի» գլխավոր մարզիչ նրա առաջին հարցազրույցը հունիսի 25-ին էր։ Երկու շաբաթ անց արդեն սկսվում էր Չեմպիոնների լիգայի ընտրական փուլը։
Պերկովիչը, միևնույն է, թիմը տարավ երկար եվրոպական ճանապարհով և ապահովեց լիգայի լավագույն գոլային տարբերությունը։ Բայց նորմալ նախապատրաստական շրջան նա գործնականում չունեցավ։
Այս ամառն այլ է։ «Նոան» հունիսի 17-ից հուլիսի 8-ը պատրաստվել է Սլովենիայում և անցկացրել չորս ընկերական խաղ։
Ընկերական խաղերի արդյունքները երկրորդական են։ Կարևորն այն է, որ եղավ մեկ ամիս լիարժեք աշխատանք, ուժեղ մրցակիցներ և նորեկներին խաղընկերներին ինտեգրելու հնարավորություն՝ մինչև պաշտոնական խաղերը։ Ֆենթզիի տեսանկյունից արժե նշել նաև, որ Հովհաննես Համբարձումյանը երկու գոլ խփեց. խաղում նա շարունակում է պաշտպան համարվել։
Տրանսֆերներ. նոր առանցք և գրանցման գլուխկոտրուկ
«Նոան» փոխել է երեք գիծն էլ։
«Ժիլ Վիսենտե» · հավանական առաջին համարը
«Բուրգոս» · 5 գոլ 25/26-ում
«Աբերդին» · 4 գոլ Շոտլանդիայում 25/26-ում
«Արարատ» · 10 գոլ առաջնությունում
նոր ձախ եզրի պաշտպան
«Գրենոբլ» · ձախ կենտրոնական պաշտպան
«Արարատ» · երեք մրցաշրջան Հայաստանում
ԲԿՄԱ · 1678 րոպե առաջնությունում
«Վոյվոդինա» · 10Գ 2Փ
10Գ 1Փ՝ 804 րոպեում
3Գ 4Փ՝ 581 րոպեում
«Ֆարենսե» · 9 «չոր» խաղ 14 հանդիպումում
«Փյունիկ» · ուղիղ մրցակից
դարպասի և պաշտպանական խորության թարմացում
Դումբիայի և Դոմբիլայի տրանսֆերներում կարևորագույն դեր ունի նրանց տարիքն ու ժամանակագրությունը։ Պատճառը Հայաստանում պատրաստված ֆուտբոլիստների կանոնն է։ Բարձրագույն խմբի ակումբը մեկ խաղի հայտում կարող է ներառել մինչև 23 ֆուտբոլիստ, բայց նրանցից առնվազն ինը պետք է լինեն Հայաստանում պատրաստված, և առնվազն երեքը պետք է ամեն պահի դաշտում լինեն։ «Նոայի» 25/26-ի կազմում կար 19 լեգիոներ։ Լիգայում ոչ մի ակումբ այդքան քիչ մանևրելու տեղ չուներ։
Ամենահետաքրքիրը սահմանման մեջ է։ Ֆուտբոլիստը համարվում է Հայաստանում պատրաստված, եթե հայկական ակումբում գրանցված է եղել առնվազն երեք մրցաշրջան՝ 15 և 21 տարիքը լրանալու մրցաշրջանների միջև ընկած ժամանակահատվածում։
Կալիֆալա Դումբիան ծնվել է 2004-ի սեպտեմբերին և «Արարատ» է տեղափոխվել 2023-ի օգոստոսին՝ 18 տարեկանում։ Կլինտոն Դոմբիլան ծնվել է 2005-ի փետրվարին և միացել է նույն ամսին՝ նույնպես 18 տարեկանում։ Երկուսն էլ Հայաստանում գրանցված են եղել երեք մրցաշրջան, և այդ ամբողջը՝ նշված ժամանակահատվածում։ Երկուսն էլ Հայաստանում պատրաստված ֆուտբոլիստներ են։
Ահա թե ինչու այս երկու տրանսֆերը զուտ ֆուտբոլային որոշումներ չեն։ «Նոան» գնել է ոչ միայն առաջնությունում տասը գոլ խփած հարձակվողի և 21-ամյա աջ պաշտպանի, այլև երկու ֆուտբոլիստի, ովքեր զբաղեցնում են «Հայաստանում պատրաստվածի» տեղը։ Սա օրենքի բացը շրջանցելը չէ. սա հենց այն ուղին է, ինչի համար կանոնը գրվել է։
Մամբոն նորից փոխում է պաշտպանության հաշվարկը։ 27-ամյա ձախ կենտրոնական պաշտպանը կարող է խաղալ նաև որպես հենակետային կիսապաշտպան և ձախ եզրում, ունի Լիգա 2-ի փորձ, իսկ Transfermarkt-ի գնահատմամբ արժե 500 000 եվրո։ Ֆենթզիում նրա գինը 5.5մ է. կարգավիճակը հասկանալի է, րոպեները՝ ոչ։ Հետնագծում այժմ մրցում են Սենտինին, Մուրադյանը, Բոակյեն, Մամբոն, Պավլովիչը, Սուալեհեն և Դոմբիլան։
Այս համատեքստում ավելի հասկանալի է դառնում նաև Ուլադ Օմարի հանկարծակի հեռացումը՝ պայմանագիրը մինչև 2027-ը երկարաձգելուց ընդամենը մեկ տարի անց։ Չենք կարող պնդել, որ պատճառը հենց այս պահանջն էր, բայց 19 լեգիոներ ունեցող կազմը, որը ամեն խաղի համար պետք է գտնի ինը Հայաստանում պատրաստված ֆուտբոլիստ և երեքին պահի դաշտում, ակնհայտորեն ստիպված է բարակել։
Լազետիչի ժամանումը
«Նոան» պաշտոնապես հաստատել է «Աբերդինի» հարձակվող Մարկո Լազետիչի տրանսֆերը։
Լազետիչը 22 տարեկան է, «Ցրվենա Զվեզդայից» «Միլան» էր տեղափոխվել մոտ 5 միլիոն եվրոյով, իսկ անցած մրցաշրջանում Շոտլանդիայի առաջնությունում 1057 րոպեում խփել է չորս գոլ և տվել մեկ փոխանցում։ Անունն ավելի բարձր է, քան վերջին տարիների արդյունքը, բայց տարիքն ու ֆիզիկական տվյալները Հայաստանում ակնհայտ պոտենցիալ են գծում։ Ֆենթզիում նրա գինը կլինի 10.5մ։
Եվրոպա. փորձը օգնում է, բայց ճանապարհը երկար է
«Նոան» Կոնֆերենցիաների լիգայում մեկնարկում է հուլիսի 23-ին՝ Քիշնևում «Զիմբրուի» դեմ, պատասխան խաղը հուլիսի 30-ին է՝ Աբովյանում։ Այս զույգում ֆավորիտը «Նոան» է։
Բայց խմբային փուլ վերադառնալը շատ ավելի դժվար է, քան մեկ փուլ անցնելը։ «Նոան» մեկնարկում է երկրորդ ընտրական փուլից և պետք է հաղթահարի երեք երկխաղանի զույգ։ Երրորդ փուլի վիճակահանությունը դեռ չի կայացել, ուստի Զիմբրուից այն կողմ ցանկացած ճշգրիտ ուղի ենթադրություն է։
Փոխվել է ելակետը։ Այս թիմն ու մարզիչն արդեն գիտեն, թե ինչ է եվրոպական ուղևորությունը, հետաձգված առաջնության խաղերը և շաբաթը երկու հանդիպումը։ Անցած մրցաշրջանի առաջին 15 տուրի 24 միավորը ցույց է տալիս, որ փորձը գինը չի վերացնում, բայց ակումբը պետք է ավելի պատրաստ լինի դրան։
Կանխատեսում. 1-ին տեղ
Մեր տարբերակը՝ «Նոան» կդառնա չեմպիոն, և տարբերությունը կարող է մեծ լինել։
Հիմնավորումը պարզ է։ Անցած մրցաշրջանում «Նոան» ուներ լիգայի լավագույն հարձակումը, լավագույն պաշտպանությունը և +42 գոլային տարբերություն։ Վերջին 12 խաղում հավաքեց 32 միավոր՝ 36:5 գոլային հարաբերակցությամբ։ Պաշտպանական առանցքը հիմնականում պահպանվել է, մարզիչն այս անգամ ունեցավ լիարժեք նախապատրաստություն, իսկ հարձակման նոր տարբերակները փակում են ամենամեծ կորուստները։
Ռիսկերը երկուսն են։ Հարձակումը կորցրել է 23 գոլ խփած ֆուտբոլիստների, և հնարավոր եվրոպական աշունը նորից կձգի կազմը։ Բայց «Նոան» ունի ավելի մեծ խորություն, քան ցանկացած ներքին մրցակից, և արդեն ապացուցել է, որ կարող է երկու ճակատով խաղալ։
«Արարատ-Արմենիան» անցած մրցաշրջանում ավելի կայուն թիմն էր։ «Նոան»՝ ավելի ուժեղը։ Ակնկալում ենք, որ այս անգամ այդ ուժը կվերածվի չեմպիոնության։
Ֆենթզի. ո՞ւմ ընտրել
«Նոան» խաղի ամենադժվար ակումբն է. մեկ թիմից առավելագույնը երեք ֆուտբոլիստ վերցնելու սահմանափակումը ստիպում է ընտրություն կատարել լիգայի ամենաուժեղ պաշտպանության և ամենախոր հարձակման միջև։
Գներ (վերջնական չեն, մեկնարկից առաջ կարող են փոխվել)
Ֆիգեյրա5.5մԿոնեգլիան5.0մԴավթյան4.5մԱվետիսով4.0մԲոակյե6.5մՍենտինի6.5մՍուալեհե6.5մՍ. Մուրադյան6.5մՄամբո5.5մՊավլովիչ5.5մՀամբարձումյան5.5մՄ. Ավետիսյան4.5մԴոմբիլա4.5մԱ. Մովսեսյան4.0մՀելդեր12.0մՅակոլիշ11.0մԿոստակե9.0մՄանվելյան9.0մՍանգարե8.5մՕշիմա6.5մԽամոյան6.0մԷտեկի5.5մվնասվածքԱ. Ավանեսյան5.5մՖոֆանա5.0մվնասվածքԽուդավերդյան5.0մԲուա Մբիլիա4.5մԼազետիչ10.5մԿ. Դումբիա8.5մՄ. Գոնսալես8.0մԱսիրյան4.5մԳարեգինյան4.5մՊաշտպանությունը՝ էժան մուտք լավագույն թիմ
«Նոան» 27 խաղում պահեց 16 «չոր» խաղ՝ չեմպիոնից վեցով ավելի։ Թղթի վրա սա խաղի լավագույն պաշտպանական հեռանկարն է, և այն համեմատաբար էժան է։ Էրիկ Բոակյեն և Դավիդ Սուալեհեն այդ «չոր» խաղերից 12-ը սկսել են մեկնարկային կազմում, Նաթանաել Սենտինին՝ 11-ը, Սերգեյ Մուրադյանը՝ 10-ը։ Նրանցից ոչ մեկը 6.5մ-ից թանկ չէ։
Իսկ հիմա այս ամենը կարդացեք ռոտացիայի կողքին։ Այդ չորսը միասին խաղացել են ընդամենը յոթ անգամ։ Զոլոտիչը հեռացել է «Ֆարենսե», բայց եկել են Մամբոն, Պավլովիչը և Դոմբիլան՝ հիմնական կազմում տեղի համար պայքարելու։ Ում էլ գնեք, դուք գնում եք պաշտպանության բաժնեմաս, ոչ թե երաշխավորված մեկնարկային ֆուտբոլիստ։
Դոմբիլան 4.5մ-ով այն տարբերակն է, որին արժե հետևել, բայց ոչ շտապել։ 21 տարեկան է, Հայաստանում պատրաստված է և չեմպիոնության գլխավոր ֆավորիտի ամենաէժան պաշտպանն է։ Բայց նախ պետք է հիմնական կազմ մտնի։
Հելդերը՝ միակը, ում շուրջ կարելի է կառուցել
Հելդերը առաջնությունում խփեց տասը գոլ՝ ակումբում լավագույն ցուցանիշը, և 27 խաղից մեկնարկեց 21-ում՝ ավելի շատ, քան մյուսները։ Ֆենթզիում նա կիսապաշտպան է, ինչը նշանակում է, որ նրա յուրաքանչյուր գոլն արժե հինգ միավոր։ 12.0մ-ով նա կազմի ամենաթանկ ֆուտբոլիստն է և ամենահեշտ արդարացվողը։
Յակոլիշը 11.0մ-ով մյուս տարբերակն է՝ հինգ գոլ և ութ փոխանցում, 90 րոպեի հաշվարկով գրեթե նույն արդյունավետությունը, ինչ Հելդերինը։
Վալենտին Կոստակեն ավելի էժան է երկուսից էլ՝ 9.0մ, և կազմի ամենադժվար գնահատվող ֆուտբոլիստն է։ Անցած մրցաշրջանում «Նոայում» ոչ ոք նրանից բարձր արդյունավետություն չուներ՝ գոլ և երեք փոխանցում 351 րոպեում։ Բայց ոչ ոք էլ նրանից քիչ չխաղաց, և մրցաշրջանն ավարտեց վնասվածքով։ Սա խաղադրույք է ֆուտբոլիստի, ոչ թե րոպեների վրա։
Եվ ահա Մանվելյանը
Գոռ Մանվելյանն արժե 9.0մ՝ Յակոլիշից ամբողջ 2.0մ-ով էժան, իսկ առաջնությունում մեկնարկել է ընդամենը չորսով պակաս։ Չորս գոլ և չորս փոխանցում՝ տասնյակի դիրքից։
Նրա րոպեներն ապահով չեն։ Այս ակումբում ոչ մեկինը ապահով չեն, և Խամոյանն ու մյուս հայ ֆուտբոլիստները մեկնարկային կազմում նույն դիրքն են ուզում։ Բայց նա ավելի հաճախ էր խաղում, քան չէր խաղում, և այն էլ՝ Հայաստանի լավագույն հարձակման ամենաստեղծագործ դիրքում։ Իսկ գինը ցածր է երկու խաղընկերներից, ովքեր նույն գործն են անում։
Եթե ուզում եք մեկի փոխարեն վերցնել «Նոայի» երկու կիսապաշտպան, Հելդերն ու Մանվելյանը միասին արժեն 21.0մ։ Հելդերն ու Յակոլիշը՝ 23.0մ։
Հարձակվողի հարցը կարող է սպասել
Լազետիչը 10.5մ գնով գալիս է որպես աստղային տրանսֆեր և թղթի վրա համարվում է հիմնական հարձակվողը։ Սակայն նրա մրցակիցների արժանիքները ևս մեծ են։
Դումբիան տասը գոլ խփեց «Արարատի» կազմում, որը զբաղեցրեց նախավերջին տեղը և ընդհանուր առմամբ խփել էր 21 գոլ. գրեթե կեսը նրանն էր։ Սա բացառիկ մասնաբաժին է թույլ հարձակման մեջ և առաջնության չորրորդ լավագույն ցուցանիշը։ «Նոայում» նա շատ ավելի լավ սնուցում կստանա, բայց նաև շատ ավելի մեծ մրցակցություն։
Ընդ որում՝ նա Հայաստանում պատրաստված է, ինչը նշանակում է, որ կարող է հարձակումը գլխավորել՝ առանց լեգիոներների տեղերից մեկը զբաղեցնելու։ Սա իրական փաստարկ է հօգուտ նրա մեկնարկելու, և այդ ամենը՝ 8.5մ-ով։
Մարիո Գոնսալեսի (8.0մ) կարիերան ավելի ծանրակշիռ է, սակայն 25/26-ում «Բուրգոսի» կազմում 28 խաղում խփել է ընդամենը հինգ գոլ։ «Նոան» ունի երեք լիարժեք կենտրոնական հարձակվող՝ առանց հաշվի առնելու եզրայիններին, ովքեր կարող են ներս մտնել։
Խելամիտն այս փուլում համբերությունն է։ Վերցրեք նրանց, ովքեր արդեն խաղում էին, և թողեք, որ առաջին տուրերի կազմերն իրենք պատասխանեն հարձակվողի հարցին։
Մեր ընտրած երեքը
Հարցրեք մեզ երեք շաբաթ անց, և երրորդ անունը կարող է փոխված լինել։ Յակոլիշը 11.0մ-ով ունի ակումբի լավագույն ցուցանիշը փոխանցումներով՝ ութ, և լիարժեք հավակնություն այդ տեղին։ Իսկ եթե Դումբիան մեկնարկի առաջին երկու տուրերում, նրան անտեսելը դժվար կլինի։ Ահա «Նոան» մեկ նախադասությամբ. բոլորն ունեն փաստարկ, ոչ ոք՝ երաշխիք։
Ամփոփում
«Նոան» չեմպիոնությունից հետ մնաց չորս միավոր, բայց գոլային տարբերությամբ չեմպիոնին գերազանցեց 17 գոլով։ Մրցաշրջանի եզրափակիչ հատվածում հավաքած 32 միավորը այս ամբողջ նախադիտման ամենաուժեղ փաստարկն է։
Կազմը փոխվել է, հատկապես կենտրոնական հարձակվողի դիրքում։ Պերկովիչն այս անգամ ունեցավ լիարժեք նախապատրաստություն, իսկ «Նոան» համալրվել է՝ միաժամանակ հաշվի առնելով և՛ որակը, և՛ գրանցման իրավունքը։
Նրանք մեր գլխավոր ֆավորիտն են։ Իսկ ֆենթզիում հիշեք այս նախադիտման ամենակարևոր թիվը՝ 27 տարբեր կազմ 27 խաղում։ Գնեք նրանց, ովքեր դաշտում էին, ոչ թե նրանց, ում անուններն են ամենահնչեղը։